آسف يارب

آسف يارب

الشمس لسه مفتّحه .. بتبص للشباك بخوف ..
أحلام جديده بتتولد وتدوسها رجلين الظروف ..
شكلى اللى فـ البروايز بقى .. حبة صور متعلقه ..
ياقة قميصى ووحدتى .. تجاعيد حيطان متشققه ..
وجروح فـ روحى معلّمه ..معرفش ليه الوقت ساب ..
إيدى فـ سكه مضلمه ..
عمرى جرى وجريت وراه ..
فـ طريق مكنش بينتهى فيه الوجع بيجيب وجع والمشكله تجيب مشكله ..
يارب ليه آسف يارب .. من امتى كان لي أسئله
!!! كل البشر قصاقيص ورق وإزاز وطوب ..
وكلام كتير وشوش و لف ..
كام جرح ساب جواك ندوب ؟! ..
كام جرح خف ..
كل الصحاب حبة صور ..
كل الصور .. حبة سنين .. متبعتره فـ ألبوم قديم ..
بتعيش مجرد نص حد .. بتقابله صدفه يكملك ..
يارب ليه ؟! .. آسف يارب ..
من إمتى أصلا بسألك ؟!

التعليقات

تعليق