أولى أول

أولى أول

أولى أول .. درج تانى ..
شنطه أقوى من كتافى ..
والصحاب والصبح بدرى .. والشتا أبو حضن دافى ..
لسه فاكر كل حاجه .. زى ما تكون لسه حاصله ..
لسه انا مستنى تيجى ولسه نفس البنت واصله ..
وأبله فايزه لسه عايزه ..
لوحه فيها درس عربى .. ولسه غاوى هزار أيادى ..
ولسه صاحبى غاوى ضربى ..
ولسه كورتى جنب صورتى ..
ولسه فـ الحوش بجرى وأنهج ..
لسه ليلة لـ إمتحان غاوى آراجع أى منهج ..
لسه حتى ستى عايشه ..
ولسه بيت عيلتى مماتش ..
لسه بحضن أبويا وأصرخ .. بعد جون جبناه فـ ماتش ..
لسه غايب من دروسى ..
ولسه مش محتاج فلوسى ..
غير عشان سايبر بروحه ..
لسه بشتاق للأماكن ..
جدى مات من فتره لكن .. فـ المكان موجود بروحه ..
لسه فـ الايام بواقى من حنينى وإشتياقى .. سنى جارح كبريائى ..
عمرى ليه عمال يطوّل ؟! ..
لسه انا عيل بيكبر ..
نفسه يرجع أولى أول.

التعليقات

تعليق