أول كل حاجه

أول كل حاجه

زى أول كل حاجه ..
زى أول مره أجيلك 6 فبراير معاد ..
زى أول مره أعيط ..
لما يضربنى البعاد ..
زى أول مره أرجع ألقى جدى مات فـ أوضته ..
زى أول مره أبويا كتب لأمى جواب بخطه ..
زى أول مره أضيع شنطتى وكتبى وحاجاتى ..
زى أول علقه سخنقه خدتها علشان فالاتى ..
زى أسئلتى البريئه .. ليه مشوفتش ربنا ؟! ..
زى واجب درس كيميا .. غبت فيه طول السنه ..
زى أول مره أشوف إسمى على موبايلك ” حبيبى ” ..
زى أول ميت جنيه فـ مرتبى بتخش جيبى ..
زى أول حضن صامت ..
الكلام كان فيه عياط ..
زى صداقتنا العاديه ..
لما قلبت بإرتباط ..
زى أول مره شوفتك ..
بوست إيدك دون ما تدرى ..
زى أول مره بكتب وإنتى أول مره تقرى ..
زى أول مره أبويا يشوفنى وانا بشرب سيجاره ..
زى قفشك كل مره ..
لما أقول انا إسم ” ساره ” ..
زى حضنك لما يسرق منى دمع عنيا فرط ..
زى مإتعودت أنسى وفجأه على سهوه إفتكرت ..
زى مإتعودت أحبك دون ما يبقى عندى شرط ..
زى إنك فجأه تبقى عندى أصلا ” كل حاجه ” !

التعليقات

تعليق