حيطة أمل

معلق روحه عـ الشماعه جنب الباب ..وسايب باب ماضيه المُر متوارب..
كعبه اللى دار فـ الدنيا لف وداب ..ساب للحياه الحبل عـ الغارب !
ساند على حيطة أمل مايله..
ماسك فـ إيدى من زمان كلمة (يا ريت)..
معجون بمية صبّها العفاريت..
مجنون انا عايش بلا ليلى..
عقرب فـ ساعة حيطه لدغ الوقت..
لا عرفت انا إمتى وفين ..
وإزاى انا إتعلقت..
بس المهم الحبل كان دايب..
بلعب فـ دور الكل فيه عواجيز..
الدنيا كازينو كبير ملوهش عزيز..
كوتشينه كل ورقها كان (شايب)..
عقرب فـ ساعة حيطه لدغ الوقت..
وقعت سنين العمر مقتوله..
مهما أنتهي بلاقينى تانى بدأت.. غاوى ألف فـ دايره مقفوله..
كسرت عنيك الشمس وقت نهار.. فنزلت يومها الشارع الفاضي..
ولقيت مافيك كان بيت قديم انهار.. أطلال بواقى حجات من الماضي..
وقعدت عـ القهوه اللى مش زحمه.. رغم ان فيها كتير بشر قاعدين..
وفضلت ماسك قلبك البردان بإيدين كمان زيه كده باردين..
القهوه قلبت وشّها فـ سكتّ..
وسألت مال الحظ فـ الفنجان !
ولقيتنى غاوى انى أعشق بنت ..
غاويه تحب البُعد والنسيان !

التعليقات

تعليق