سين سؤال

سين سؤال

ريحتك مطر .. حضنك بيشبه مصر وقت ما يبتدى ..
يغسل شوارعها الندى ..
هو انتى ليه دايما كده ؟! ..
بتقربى وبتبعدى ..
وبتسندى على حجة الخوف مـ اللى جى ..
عشان نفارق بعضنا ؟! ..
هو انتى ليه دايما قرارك بُعدنا ؟! ..
مبقتش قادر أصدقك ..
مبقتش حمل الإشتياق ..
انا كنت خايف أعشقك ..
دلوقتى مرعوب مـ الفراق ..
قربتى ليه ..
لما انتى ناويه تاخدى جنب ؟! ..
وبعدتى ليه ..
وإزاى مبتحسيش بذنب ؟! ..
مبقتش عارف أى حاجه مُحدده ..
هو إنتى ليه على طول كده ؟!!
هو انتى ليه دايما كده ؟! ..
صدّانى وقت الإحتياج .. ضمّانى أوقات الملل ..
لسه اللى بينا بيتولد .. فمتقتليش فيه الأمل ..
انا لسه ليا فـ سكتك كام خطوه ناويين يكملو ..
انا لسه فـ اديكى وقوليلى ..
ايه بس بإديا أعمله ..
انا قولت مره فـ وقت ماصارحتك بإنى ..
نفسى اكونلك عمر جى بيتكتبلك ..
متخلنيش اندم عشان قربتى منى ..
وإوعاكى تبقى زى هما ماكانوا قبلك

التعليقات

تعليق