عنّى كإنسان

عنّى كإنسان

عن كلمة (عن) اللى بقولها ..من فتره طويله بقالى كتير..
عن سر حكيته لـ كذا صاحب ..عن سر داريته لأنه كبير..
عن كلمة(ممكن نبقى صحاب؟).. عن كلمة (بظروفها نسيبها..(
عن كدبه ضميرى مأنبنيش ..وانا جاى على قلبك بكدبها..
عن كلمة ” أنا ” عايزاك جنبى ..وعن كلمة (انا مشغول دلوقت(..
عن غيرتك مـ البيدج بتاعتى ..علشان بتشاركك فيا الوقت !
عن ناس معرفهاش سألتنى ..انا ليه زعلان دايما وكئيب!
عن ردي كتير بـ (مفيش حاجه(..
عن ناس شايفينك بالفطره ..انسان متقلب وغريب..
عن Can الكوكا المتخانق ..مع طبق الفول فـ التلاجه..
عن طعم رغيف العيش لما ..يحضن حتت الجبنه الرومى..
عن حيرتى انا هلبس إيه بكره ..
عن إختى اللى بتكوى هدومى..
عن نومك زعلانه إمبارح.. علشان جات سيرة حب قديم..
عن ورده وصوت فيروز وحليم..
عن طعم الشعريه بسكر ..
عن شكلى زمان قبل أما أكبر..
عن لعب الشايب فـ المصيف..
عن لعب الكوره ورا الجامع..
عن كلمة عيدى انا مش سامع لما الشبكه تقطع صوتك..
عن كرهى لكلمة لأ منك..
عن فهمى لـ عينك فـ سكوتك..
عن بكره اللى تملّى بيسأل.. انا هكتب إيه عن حبى الزايد للماضى.. اللى انا عشته زمان..
عن كلمة الناس بتحبك.. طب حبّوك ليه ؟
مش عايز أتحب عشان شاعر..
انا عايز أتحب عشان (إنسان).

التعليقات

تعليق