عن الماضى

نفسى تكلمنى عن الماضى من غير ما تعيط فـ النص ..
من غير ما تجيب سيرة حاجه ..
بتبكى عنيك على حد عرفته وحبيته كان بيتك وانت كمان بيته ..
إداك من روحه أو إديته ..
وفـ نص السكه ونص الضحك ونص اليوم ..
إتسابت لواحدك فـ الشارع ..
فرجعت لواحدك عـ البيت ..
وقعدت لواحدك فـ الأوضه ..
والغنوه إشتغلت بالصدفه ..
فبكيت من غير أسباب واضحه ..
مش عايز أعرف أسبابك .. ولا عايز أعرف مين سابك ..
وإن كنت بقيت للدرجادى ..
عندك من أى فراق فوبيا .. وبدأت تخاف مـ الماضى بجد ..
متحبش حد ! ..
وإن غصبن عنك حبيته ..
سطّح علاقتكم لو تقدر ..
أو حبه بدون أصلا ما يحس ..
علشان ماتجيش يوم تتكلم ..
عن ماضى وتبكى عنيك فـ النص

التعليقات

تعليق