عن بنت

عن بنت

بنت الهوا ..
حرك ستاير شعرها إتحوّل نسيم ..
بنت بوجع عيل يتيم ..
وبحُضن مخلوق من شتا ..
بمشى لواحدى فـ حضنها ..
وعيونها بتمطر دموع ..
خدى اللى سبته لـ كتفها وإديا نايمه فـ كفها ..
تشبه أوى للصُبح بدرى ووحدتى ..
تشبه لـ قاعده قاعدتها مع جدتى وأخدتنا فيها الفضفضه ..
بنت لازم تتسئل _ هوّا إنتى حلوه إزاى كده _ ؟!
بنت بشجن أيام زمان ..
تشبه أوى تتر لـ مسلسل تسعينانتى ..
تشبه أوى ضحكى فـ وسط ولاد خالاتى ..
تشبه زيزينيا وأوبرا عايده وحصة الألعاب وكورتى ..
تشبه حنينى لضحكه كان ماليه صورتى ..
تشبه لكل اللى إنتهى ونفسى انه يرجع ..
تشبه لـ راحه بس راحه ساعات بتوجع ..
تشبه لـ ذاتى وذكرياتى وخط إيدى عـ الحيطان ..
بنت بشجن أيام زمان !

التعليقات

تعليق