عن عيل

عن عيل

تقدر تتكلم عن نفسك
بالشكل اللى يخليك ترتاح
ويخلى همومك تنساك
مدد على طرف سرير روحك ..
وإقطع تذكره رايح مش جى ..
وانا جى معاك
“انا آخر درج فـ زحمة فصل وآخر سطر فـ سبوره ..
انا كنت الجون علشان الكوره محبتنيش ..
مع ان انا حبيت الكوره !
انا عمرى ما قولت لبنت كلام يقدر يقنعها
تكون جنبى ! ..
من صغرى محبتش الأحلام .. ولا حبيت
اللون البمبى ..
انا طيب جدا زى ما قالوا الناس عنى
وساعات الطيبه تكون لعنه !
انا وأحمد أخويا بنتناقر ..
والبيت على طول مش بيساعنا !
انا فاكر يوم ما عنيا بكوا ..
على أبو واحد صحبى توفّى ..
انا فاكر حتى رقم أوضتى ..
وفاكر أيام المستشفى ..
وهزرا الدكتور ويايا ..
وحوار دايما بيدور بينا
تطويل أوتار رجلك لازم !
علشان فيه رجل أطول سنّه ..
انا فاكر أول عمليه انا فاكر
شكلى وشكل اللبس ..
والوجع الناتج بعد البنج ..
من ضغط الجبس !
والعجله المركونه فـ بيتنا ..
وتراب الزمن اللى دفنها
وامى اللى بتحلف منزلشى
وانا بكسر دايما حلفانها !
انا كنت بحب الشارع موت ..
مع انى مشوفتش فيه غير موت
ومكنتش ببقى هناك مبسوط ..
مع ذلك سبت طفولتى تضيع
فـ القاعده هناك !

التعليقات

تعليق