فـ حب الله

فـ حب الله

(1)
بحبك فـ وسط الحاجات اللى و اللى ..
بحبك فأقرب .. وأقرب فأصلى ..
يخونى اللى خانى فـ دمعى الكتير ..
أقول بس ربى ! .. فيتقال ” كبير ” ..
فـ أكبّر وأحبك بقلب العيال ..
جميل وانت دايما تحب الجمال ..
ومنك وليك وحدك إنت المسير ..
وبيك وحدك انت يا رب المصير ..
بحبك برغم إنى بطلع أخير فـ كل إمتحان عتش فيه وإتعمل لى ! ..
بحبك فـ وسط الحاجات اللى واللى !

(2)
علاقتى بـ بربنا تشبه لحاجه مش شبه حاجه..
بحس انى فـ عنيه حاجه وكل الخلق دول حاجه ..
وأعوز حاجه فيدينى بدال الحاجه ميت حاجه ..
وياخد منى فأضايق ..
برغم انه اللى جاب أصلا .. وأنا أصلا ولا حاجه !
(3)
يارب انا.. صدقنى مُفتقدك أوى ..
وعلاقتى بيك مبقتش تشبه للى فات ..
جايلك وانا ندمان بجد وقلبى مفلوق مـ العياط ..
صدقنى انا مش جى عشان عندى امتحان ..
ولا حتى جى عشان غرض ..
انا جى عشان قربك امان ..
والبعد عن دربك مرض !!

التعليقات

تعليق