قصاقيص 1 إلى 10

قصاقيص 1 إلى 10

(1)
انا جاهز أبيع نفسى يا باشا ..
وهدمع جدا عـ الشاشه ..
وهنهنه وأتشحتف وأبكى ..
وهفضفض فـ الإعلان وأحكى ..
بس متنساش وعدك بالكشك ..
والصدقه الجاريه و كام ملطوش ..
فـ الآخر برضه مبيكفوش ..
وهنام بردان مش لاقى لحاف ..
وهقف فـ طابور العيش الحاف ..
وأجرى الفجريه ورا الأوتوبيس ..
للدرجه اللى هتقطع نفسى ..
مانا بصعب على جوعى الكافر ..
لكن مش بصعب على نفسى !!

(2)
وتضربك الحياه فجأه ألم على وش أحلامك ..
تفوق على صدمه تتمنى .. تموت حالا عشان ترتاح ..
مفيش للفرح ليه مفتاح ؟؟! ..
وليه طيب ؟!!! ..
طاوعت عنيا للآخر وبصيتلك ..
وليه طيب رميت الماضى مـ الشباك ..
عشان تبقى اللى جى كله ..
وليه طيب وليه طيب .. وليه أصلا انا طيب
(3)
حتى إنتى طلعتى بتمشى ؟! ..
من غير أسباب مقبوله ..
لفيتى معايا بـ بعدك ..
نفس الدايره المقفوله ..
مشهد كلاسيكى انا شوفته ..
مع كل الناس من قلبك ..
لكن عيطت كإنى ..
شايفه و للمره الأولى ..
المخرج سقف جدا ..
مشهد مفيهوش ولا غلطه ..
وأنا عشت فـ حبك بدّن ..
لكن يا خساره فـ مالطه ! ..
لا عرفت لـ بابك سكه ..
ولا عارف فين عنوانك ..
مانا كنت بقابلك صدفه ..
وأعرف من نفسى مكانك ..
لو كان لسه بإمكانك ..
تستنى لآخر فصل ..
فـ بقولك قبل قرارك ..
كل النهايات مجهوله

(4)
الساعه اللى تملّى بتمشى ..
عكس ما ببقى انا دايما عايز ..
قلبى المقموص من ماضى قديم ..
وشى المتركب على وشى .. م
تعود دايما أبقى كتوم ..
هتكلم قدام شيئ جايز ..
لكن صدقنى انا مش عارف أتكلم حالا معلشى ..
فـ الدرج منوم هاتهولى ..
كوباية الميه هناك عندك ..
أنا آسف علشان جيت ولقيت ..
صاحبك مبقاش ينفع سندك ..
أنا آسف على إنى مكركب وملخبط جدااا من جوا ..
كان نفسى أكون اللى إتعودت ..
تحكيله لكن انا مش هوا ..
لو جى عشان تحكيلى إحكى ..
لو جاى عشان تسمعنى فـ قوم ..
انا كل ما بتكلم ببكى ..
انا كل ببكى بروح فـ النوم ..
وبقوم مفزوع على صوت ذكرى ..
وأتنهد وأستغفر وانام ..
صدقنى انا علاقتى بـ بكره ..
على عكس اللى إتمنيته تمام ..
متجرجرنيش فـ كلام أرجوك ..
خلينى لحيرتى ولـ سكوتى ..
انا انت ومعرفتكش عشان ..
ن كتر سكوتى نسيت صوتى !!

(5)
بحبك ولكن .. مقولتش وجايز ..
هقول بس صبرك عليا لأنى ..
مفيش فيا حته .. تساع جرح تانى ..
بحبك ولكن .. بخاف أبقى عايز ..
أكون فتره وحدى .. فـ أسيبك لإنى ..
هوائى وأنانى ..
انا حد طيب ..
فلو قولتى طيب ..
هكونلك قريب ولكن ..
بـ بُعد ..
انا قلبى جرب ..
وحاول وقرّب ..
لكن فجأه أصبح ..
يخاف يدى وعد ..
فلو كنتى قابله بشروطى إقبليها ..
ولو كنتى ماشيه منيش هندهك .. أسيبك فـ أول حياتنا ده أحسن .. من إنى أكمل معاكى أكرهك !!

(6)
القهوه بتبرد فـ إديا ..
وعنيكى فـ عينى لكن تايهين ..
وكإن الزحمه بقت فينا ..
مش فـ العالم والبنى آدمين ..
سكان ..
دخان ..
وشوش و ببان .. مقفوله بقفل ..
مشكلتى معاكى إن انا مش عايز أفضل طفل ..
مشكلتلك انك رقصه سلو .. على كوكب من بره الدنيا ..
وانا عمرى ماكان فوق ضهرى جناح .. مشكلتى ان انا مش فـ الجنه ..
ولا حبك قطمة تفاح ! ..
مشكلتك انك مش حوّا ..
مشكلتى ان انا عامل آدم ..
منكرش اننا كنا فـ يوم حلم ..
والحلم فـ لحظة الخوف سرقوا ..
انا وانتى اتنين مهما يحاولوا يفضلو مع بعض ..
هيتفارقوا

(7)
حكايتك وسيرتك مرايتك وصورتك..
وتوهت ملامحك فـ زحمة وشوش
قميصك وياقته وعمرك ووقته وكام شيئ بدأته ..
مكملتهوش ..
تقرّب تسيبهم ..
تسيبهم تقرّب ..
فتفضل لآخر حياتك تجرب ..
فتندم وتفهم ..
بإنك مفيش .
تقابل وتقبل ..
بدورها الدرامى ..
فـ حدوته أجمل ما فيها الأسامى ..
تمثل فـ تفضل برغم اللى يحصل مجرد افيش

(8)
اللى فاتك واللى ماتلك..
ذكرياتك ماضى قاتلك ..
واللى راح لـ فلان ما راحله ..
واللى جاى جى بمراحله ..
واللى سابك واللى سبته ..
واللى وداك واللى جبته ..
واللى من عشمك عاتبته ..
بس مفهمش العتاب ..
واللى خيبتك زى خيبته ..
والجواب اللى كتبته ..
وهيا مقرتش الجواب ..
سيب لو انت كنت خايف ..
موت عشان تعرف تعيش ..
تفرق ايه لو قولت مالك ؟! ..
لو جاوبتينى بمفيش ! ..
هيا ماشيه وبكره ماشى ..
دايره هتدور عـ الجميع ..
كل شيئ علشان يجيلك ..
شيئ قصاده كمان يضيع

(9)
وكإن بعدك عنى لحظة موت أبويا ..
على كتف أمى التايهه فـ المشهد بصمت ..
أو مره فيها انا كنت ماشى والعيال عايرونى انى ماشى بعرُج فإبتسمت ! ..
وكإن بعدك عنى Cancer أو شلل ..
أو زقه من فوق فوق أوى ..
فـ وقعت مكسور عـ الملل ..
عمال بعّد الذكريات وأحكى حكايات وأكتب وأقول ..
وأنسى انى عايز أنسى فأضطر أفتكر ..
وأنسى إنى عايز أحب غيرك فـ أعشقك ..
وأنسى انك إنتى خلاص بقيتى ميّته ..
أبكى تشاركنى السما وتنزف شتا ..
وأبدأ أحاول أعيش فأموت ..
وأنسى إنى مضطر أبقى عايش فأنتحر ..
وأشنق سنينى الجايه على حيط اللى فات ..
وأفضل مصمم وأقتنع ..
ان انتى عايشه وكل يوم إحنا سوا ..
عايش بيتمنى يكون وياكى مات ..
ومفيش رصاصة رحمه أو حقنة هوا

(10)
وطلعت لفوق جدا جداا ..
صليت وكإنى بودعكوا ..
معلش كلامى هيوجعكوا ..
فـ إقروه للآخر لو حابيين ..
كلنا مساكين ..
أموات عايشين أو بين لـ إتنين ..
انا كنت مفكر وانا عيل إن الأيام أفلام سيما ..
ورضيت بالواقع لما فهمت ..
حكمة ربنا فـ التقسيمه ..
كلنا جايين الدنيا بنقص وبحاجه زياده عن الباقيين ..
ويارب إزاى .. وانا مش بسأل ..
ليه حكمه فـ كل اللى بيحصل ..
سبحانك قسّمت الأرزاق ..
أشكال أنواع ..
ولغات أسماء ..
وشوارع فيها بيوت وحارات ..
وجوامع وكنايس وبارات ..
لا بتمنع رزقك عن كافر ..
ولا سايب مؤمن فـ الضيقه ..
ربنا موجود والنبى موجود ..
والموت زى حسابنا حقيقه !

التعليقات

تعليق