قصاقيص 11 إلى 20

قصاقيص 11 إلى 20

(11)
كل حاجه ناقصه صوتك ..
ناقصه سيرتك ..
ناقصه تكشيرتك فـ غيرتك
ناقصه ريحتك ناقصه روحك ..
ناقصه حضنك ناقصه خدك لما يتحول لـ ورد ناقصه نفسك لما يلمس ..
كف إيدى فـ وقت برد ..
لسه حتى القهوه مره فـ إنتظار سُكّر شفايفك ..
غبتى فجأه وسبتى قلبى فـ كل حاجه شايفها شايفك

(12)
.. نص فاضى .. عينى رايحه لكل ماضى ..
ناس انا مبقتش أشوفها ..
ناس شافتنى خدتنى حضن ..
ست حزن ..
سبت عـ الشباك أغانى ..
سبت للأيام سنينى ..
سبت للكشاكيل قصايد ..
سبت لعيونك حنينى ..
قولتى ماشيه قولت خايف ..
قولتى لازم .. قولت لأ ..
دمعّى مطّر بين إديكى ..
كل ركن فـ قلبى دق ..
قولت حُضنك قولتى إنسى ..
أى حاجه وكل حاجه ..
نمت فجأه صحيت لقيتنى حد غيرى فـ كل حاجه ..

(13)
مديلى جناحك ..
نطلع فوق ..
منجيش تانى ..
الزحمه بتشرب دمى فـ كاس ..
وانا بشرب فـ الناس أحزانى ..
إدينى الفرصه أمسك إيدك ..
وأتحول ناى ..
لو غنيتى ..
انا جى عشان إستنيتى..
انا عايز أمشى عشان نفسى ..
مفضلش أشوفنى بلون بهتان ..
محتاج مـ الناس تفهم إنى ..
فـ الأول أصلا إنسان

(14)
آنا آخر بؤ فـ مج الشاى ..
إتساب علشان أصبح بارد ..
انا جايز يمكن انا عادى ..
وانا شيئ مبقاش أصلا وارد ..
الدنيا بتربطلى جناحى ..
وجناحى المربوط بيعافر ..
انا خايف قلبى يموت كافر ..
يقطع شراينه فـ لحظة ضيق ..
علشان متحبش غير مره ..
كان حضنك يشبه ليه ” موسكو ” ..
وكان طعمك طعم بلاد بره ..
الغربه بتكبر يا حبيبه ..
وقريبه بقت عنى غريبه ..
إدينى طريقه عشان انسى ..
مش عايز وقت ونوم زايد ..

(15)
انا زى المترو بشيل ..
جوايا ورايح جى ..
انا ميت جدا لكن ..
من بره ببانلك حى ..
فـ تشوفنى بوش مدارى ..
كل الأحزان بستاره ..
وإن عوزت تشوفنى كويس ..
لبّس قلبك نضاره ..
انا وانت وغيرنا وغيرهم ..
ناس موتهم تفكيرهم ..
على نفس الحبل بنمشى ..
وبنرسم نفس الخط ..
انا خايف جدا منى ..
انا أبعد ساكن عنى ..
فـ بقيت عايش ولكنى ..
زى الأموات بالظبط

(16)
فـ حبك كلام قالنى أكتر ما قولته ..
وحبك طريقى اللى دايما طويل ..
فـ حضتك بفضفض بكل اللى شيلته ..
فـ حزنك بحس انى عايش قتيل ..
وأدور عليكى فـ مرايتى لإنك ..
كإنك ملامحى وشكلك ده شكلى ..
بحس انى أبوكى وإبنك وأخوكى ..
همومك همومى ومشاكلك مشاكلى ..
وبزعل لزعلك وبتعب لـ تعبك ..
وعايش بروحك وريحتك وبيكى ..
كإن إحنا واحد ..
لكن مقسومين ..
عشان ابقى عايش بدور عليكى

(17)
قميصى اللى ناقص تملى زرار ..
وصورتى وحيرتى ودوشة قرار ..
مشاكلى وشكلى وجد وهزار ..
ولِيلى وطولى وطول إنتظار ..
ياريت كل حاجه .. بتيجى بـ بلاش ..
ياريت كل ماشى .. مجاش مـ البدايه ..
ياريت اللى مات فيا هوا اللى عاش ..
ومات اللى فاضل قصاد المرايه

 (18)

الرُصاصه فـ جيب ضلوعك مستقرّه فـ حضن قلبك ..
والفلاش الباك بيرجع بالزمن لمكان فراقك ..
والهوا بيخبط فـ كتفك ..
والمطر عمال بيجرح دون ما يقصد كبريائك ..
والنهايه المنطقيه للحكايه هيا هيا ..
يلا آخر مره أكشن ..
الفراق كان _ last shot_
الرصاصه بنت حلوه ..
داس صوباع الوحده قاصد ..
فوق زناد الصدفه فجأه ..
هيا خبطت فيك فـ مُت

(19)
عندك زهايمر من زمان ؟! ..
تقدر تقول من كام سنه معرفش كام ..
مبقتش بحسبها بتاريخ ..
مبقتش أفكر فـ الزمن ..
كل الحاجات الحلوه لما بتتنسى ..
تبقى بـ بلاش من غير تمن ..
تعرف يا حج انا بحسدك وإسألنى ليه ؟! ..
تحسدنى ليه يا صغير انت عـ المرض ..
هو انت يعنى خسرت شيئ تندم عليه ؟! ..
انا قصدى يعنى انك بتنسى

(20)
حاجات كتير ..
وهتنسى كل اللى إحنا حالا كنا فيه ..
انا نفسى انسى عشان انام ..
انا نفسى أبطل أقول تمام ..
وأحكى اللى جوايا مداريه ..
فضفتله وحكيت بكيت ..
قام قالى والدمعه فـ عنيه ..
هو انت مين ولا إبن مين ولا إسمك ايه ؟!

التعليقات

تعليق