قصاقيص 21 إلى 30

قصاقيص 21 إلى 30

(21)
الجاكته ..
والروشته ..
الساعه سته وصوت حليم ..
والمهدئ والمنّوم ..
والقميص المش مقلّم ..
والوجع جواك معلم ..
زى شرخ فـ بيت قديم ..
الشتا بيخبط فـ كتفك ..
والحنين كتّف دراعك ..
حتى انت مش فـ صفك ..
حتى قلبك مش بتاعك ..
سبت نفسك للشوارع ..
والقهاوى والحكاوى والصحاب ..
حلمك المربوط فـ نجمه ..
متداريه فـ السحاب ..
كنت متاخد خوانه وكنت متاخد غياب ..
وإتسألت عن اللى جايلك ..
قومت باصص للى فات و إبتسمت عشان تدارى ..
قومت ميت مـ العياط

(22)
اتسابت وسبت لحد ما خدت ..
مـ الفُرقه ومـ الحزن كفايتى ..
عودت عنيا تبص كتير ..
للنص الفاضى فـ كوبايتى ..
وشربت الناس سُكر بره ..
وحضنت الخوف مليون مره ..
للدرجه اللى تخلينى بقيت ..
مبحسش للحاجه بقيمه ..
للدرجه اللى تخلينى بكيت ..
على أتفه أفلام السيما ..
والنكته اللى بقولها قديمه ..
لكن بتلخص أهى حكايتى ! وضربت ودع ..
وضربنى وجع ..
وبنيت أحلامى على الرمله ..
وحلمت فارقت ..
وفهمت فـ فوقت ..
ما القصه أساسا مش كامله ..
وانا وانتى وناس غيرنا اتقابلوا ..
بالصدفه اتفارقوا كمان صدفه ..
وازاى وانا حاضنك يوم هـ أدفى ..
وحياتنا سناريوا كبير لكن ..
بنهايه أساسا مش هادفه !

(23)
مسألة مبدأ يا باشا ..
فـ خد كلامى عشان مهم ..
مش مجرد شو فـ شاشه ..
أو فصال على سعر دم ..
وإنى جيت علشان أقولك ..
ان إيدك سابقه عقلك ..
وإن كلبك وإن قلبك ..
واللى حواليك والطبنجه ..
كلهم أضعف أساسا من قصيده أو كمنجا !

(24)
بين مشاعرى وبين مشاعرك خيط بشدُه ..
وإحنا بين لـ إتنين حبيبتى تلج داب ..
كل مإنتى بتبنى حاجز بينا أهده ..
كل لحظة بُعد بـ سنين إكتئاب ..
سبت إيدك سبتى إيدى سيبنا بعض لذكرياتنا ..
كنا بنقرب ونبعد ألف مره فـ الدقيقه ..
كل شيئ كان حلو بينا فجأه أصبح ماضى فاتنا ..
كدبّى لو ثانيه ظنى ..
وقولى لا مش دى الحقيقه ! ..
بين مشاعرى وبين مشاعرك ..
خيط معلق روحى بيكى ..
كل شيئ إحتاجته إنتى ..
وكل شيئ محتاجنى فيكى ..
بس مهما بكون قريب .. ب
رضه ببقى بعيد وأخاف ..
إننا نفضل فـ دايرة ..
شك أو غيره وخلاف ..
والسنين تبعدنى عنك ..
وتبنى بينا الدنيا حاجز ..
وأبقى محتاجلك وعاجز إنى أقرب حتى منك

(25)
تخاف أوقات عليك منك ..
فـ تمسك إبرة النسيان ..
تحدد فين مكان الجرح وتخيط ..
تعيط قد ما تعيط ..
وتربط قلبك المجروح ..
بشاش الصبر وتسلم ..
وتحضن كل أوجاعك ..
فـ لحظة خوف من الأيام ..
انا لسه بلم الباقى من أحضان ..
صحابى فـ كل كام مره ..
بسلم فيها وانا عشمان ..
يطول الحضن للآخر و تيجى الدمعه من عينى ..
وترمى نفسها من فوق ..
تقع على كتفه يسألنى ..
يا واد قول لى ؟! .. أقول عادى ..
انا أصلا شريط فاضى ..
هتسمعنى هتسمع صمت ..
ده عيب منى مهوش منك ..
لا منى حكيت فى ايه مالى ؟! ولا منى داريت عنك

(26)
كان عندك حق ..
النُص الأبيض فيّا إغمّق ..
كداب لو قولت إن انا صافى من ناحية حد أنا خسرته ..
مع إنى بجيب بالخير سيرته ..
كداب لو قولت ان انا بفرح ..
والضحك بجد مهوش تمثيل ..
كداب لو قولت بحب الليل ..
انا لسه وحيد وبموت مـ الخوف ..
متجرجرنيش فـ كلام متشال ..
قوم سيبنى فـ حالى إعمل معروف ! ..
انا آه متشاله فـ قلب خلاص هيبطل دق ..
أنا آه نفسها تتحول لأ !

(27)
سنينك فرط .. سجايرك فرط ..
ولسه حبيبتك الحلوه ..
بتسأل انت ليه إتغيرت ؟! وحبك حب مش كامل ..
ونقصك لسه مش معروف ..
غشيم إن خوفت تتعامل ..
فـ تتعامل بشيئ مـ الخوف ..
كبرت كبرت كبرت كبرت ..
خلاص عـ الجرح وحياتك متتّكاش ..
فـ جرح الروح هتعمل ايه .. بـ بكرة شاش ؟؟!!

(28)
إلمسينى إن مُت جايز ..
فيا روحى ترد تانى ..
ليه بحبك بس دايما فيكى حاجه مخوفانى ..
فيكى شك وفيكى حيره ..
وفيكى منى حاجات كتيره ..
وكل شيئ بحتاجله فيكى وكل حاجه فيكى فيا ..
زى مانكون فوله قسمت نفسها ومش دى القضيه ..
القضيه إنى بحبك وإنتى حابه محبكيش ..
عشتى فيا فـ مت فيكى .. فـ موتى فيا عشان أعيش !

(29)
غزل البنات ..
وعيال فـ حوش المدرسه .. وعنيكى وكلام إتنسى ..
لكن فضل ..
على كل دكّه فـ تالته تانى مفكّرك ..
إيه غيرك ؟! ..
يمكن عشان الحب بيخلى اللى بيحبك غبى ..
يمكن عشان فـ عنيكى مليون معجزه .. وانا مِش نبى !

(30)
زى النهارده من سنين ..
انا كنت بدفن جدتى وماسك فـ إيدى إيد أبويا ..
وفـ العزا كان السواد مالى المكان ..
كان المكان شبه الوجع ..
أول مايلمس قلب عيل مـ العيال ..
كل الوشوش مغسوله بالدمع اللى سال ..
قرآن وصمت ونهنهه ..
على قهوه ساده وصوت صريخ ..
مكتوب على الجدران تاريخ ..
وكبرت ونسيت كل شيئ ..
أول ما روحت البقيت لقيت فجأه التاريخ لسه هناك ..
بس الجدار عجز بقى .. كل الحيطان من همها ..
كانت ضعيفه مشققه ..بيتنا القديم خرّف وشاب ..
جاله إكتئاب ..
عمال يفارق ناس بموت ..
ويعيش بذكرى حد غاب !

التعليقات

تعليق