قصاقيص 31 إلى 42

قصاقيص 31 إلى 42

(31)
كانت مشكلتى الأولى ..
ان انا مش بعرف أسامح ..
وبحب امبارح جداا ..
لمجرد انه إمبارح ..
وبحب الوقت يفوتنى ..
وانا ساند كل اللى فـ بالى ..
على كتف إزاز شباك الباص ..
إكلينيكيا أنا عايش .. مع ان انا مت خلاص !

(32)
سانده براسها عـ اللى ضاع من عمرها ..
ولا عمرها مـ الماضى قامت ..
الجو أهدى مـ الموسيقى التصويريه لـ فيلم صامت ..
الفراشه .. الباليه ..
ألف ليله وألف ليه ؟! ..
مسرح بيشبه للسحاب ..
كات ماشيه حافيه على الغيوم ..
طلعت وربطت قلبها فـ إيد القمر ..
بصت لفوق .. وعيونها بتعيط _ نجوم _ ..
كانت ضلوعها مضلمه ..
وانا كنت ناى مليان شجن ..
ودعتها زى اللى بيودع وطن ..
ومشيت وانا زى اللى تايهين فـ الزحام ..
كات غربتى غربة _ يهود برلين _ ..
وكنت أدبل من سنابل قمح يوسف فـ المنام ..
زى اللى أول مره يتفارق..
زى اللى بيفارق براح لـ ضريح رخام

(33)
بيانو وبن ..
وقهوه وبنت ..
وكرسى وناس ..
بحبك ليه ؟! ..
سؤال مكتوب ..
على الشباك بسن رصاص .
عيونك بير وانا الصديق ..
فألقينى فـ غياهب الجب ومن إمتى بنسأل ليه ..
مادام صيعة سؤالنا الحُب !

(34)
رسمتك صوره مكسوره ..
وروح عايشه بـ وش إزاز ..
لقيتك غنوه غنيتك ..
وصوتى صريخ وخوف ونشاز ..
يا عايشه فـ كل شيئ فيا عشان انا أموت ..
يا سايبه فـ قلبى ميت درويش يلفّوا عيونك الملكوت ..
يا كلمه بقولها وانا ساكت .. بشيئ مـ الخوف ..
يا حلوه فـ كل عين بتشوف ..
جمال صورتك مهوش لايق ..
عليا عشان أكون برواز !

(35)
فـ أول كل شيئ آخر لـ شيئ غيره ..
وعسر ويسر جايين لك فـ نفس التوّ والتوقيت ..
بكيت علشان فرحت زمان .. فرحت عشان لـ فتره بكيت ..
فلو يوم صدفه نتقابل .. وبصتلك وبصتلى ..
حضنتك وإنت مش فرحان ..
مشاعرك يومها وصتلتى سألتك مالك إتكلم ..
ضحكت فـ وشى وحكيتلى .. فـ سبحان اللى بـ يسبِّب ..
نسيت همى نسيت همك ..
بحضن مكنش مترتب ..

(36)
انا وإنتى دايما فـ خلف الخلاف ..
بنبعد فـ نتعب .. نقرب نخاف ..
فلا منى جيتلك .. ولا منّى غبت ..
ولا منى حاضنك ولا منى سبت ..
لا حصلت يوسف ولا كُنتى مريم ولا كُنتى ورده فـ سنينى العجاف ..
ويندهنى أول بعادى الحنين ..
أجيلك تصدى .. أصدك تجيلى ..
ندور دايره فيها الأنا والأنين أميل لو تملّى ..
أملّك .. تميلى ..
ولا عرفت أسيبك ولا عرفت أحبك ولا عرفنا حتى نحكّم قدرنا ..
ولا حتى ذنبى ولا حتى ذنبك ..
خبطنا فـ بعضينا فجأه إنكسرنا

(37)
خدنى الكلام مع بنت نِفسى تحبنى ..
و فـ فضفضت رغم الإكتئاب ..
وسرحت فـ عنيها اللى كانوا بألف باب ..
ريحة المكان قهوه .. طعم المكان كان حضن ..
يا خوف عنيا من اللى جى يا ست حزن ! ..
وقصرها عالى ..
وانا عينى غاويه تبص برضه لـ فوق ..
جتلك مكان مـ الحب كافر باللقا ..
جيتلك فـ قهوه هناك فـ باب اللوق ..
انا وانتى نفس البُرج ليه ؟! ..
والفرق بينا بس يوم .. حتى السنه نفس السنه
.. انتى مش شبهى وبس ..
انتى انا ! ..
ما تجربى تحبينى يمكن نتلضم ونلم كل اللى إتجرح فينا ..
ونقول كلام أصلا أوانه مجاش ..
ونحب بعيد عن البراويز ! ..
مش شرط تبقى نهاية الحب العظيم البيت ..
اللى هنبقى فيه سوا عواجيز ..
حلو النهايه ومرها ..
ان إحنا منشوفهاش !

(38)
سبت اللى فات كله فـ شنطة مدرسه ..
سبت الدروج تبكى بأنين ..
سورة البروج والحصه دين ..
سبت الحصص جنب السنين ..
سبت العيال .. سبت السلالم والطابور ..
كشف الحضور ..
سبت العلم جنب القلم ومشيت ..
بصيت لنفسى شويه فـ إتخضيت ! ..
انا ليه بقيت عامل كده ! ..
طب راحوا فين ؟! ..
وشى البشوش ..
لون القميص ..
جلاد ولوحه ومسطره وكشاكيل ..
واجب عليا بيتعمل بالليل ..
واللكلكه ان متعملش مـ أصل أصل وفصل ..
_آيه_ اللى كانت ..
ست حسن الفصل ..
تفصايل حياة التسعينات ..
خوف العيال مـ التطعيمات .. ..
تسمع حكاوى عيال سوا ..
على حلقة مـ المال والبنون ..
طوبتين فـ حوش المدرسه ..
يتعملو جون ! ..
والكوره مش دايما معاك ..
ولا كنت دايما ويا منها تكون ! ..
سبت ابتدائى كلها وإتسابت ..
مابين دروس ونظام وضغط وكبت ..
شرب النظام بالمعلقه مرره ..
خلى العيال يبطلوا يفكروا ..
ويحبوا يوم الجمعه وأجازته ..
ويسبّوا أى روتين بيبدأ _سبت _ !

(39)
انا سبت حد وسابنى حد ..
انا سَبت ميوديش لـ حد ..
آخر بكا لـ عنيا كان ..
فـ مكان مروحتوش من زمان ..
أول ما روحت هناك بكيت ..
أول بكايا .. كان عشان ..
والله ما أعرف كان عشان ايه وقتها ! ..
لكن خادتنى النهنه ..
وسندت راسى عـ اللى فات ..
وقعدت أفكر وأفتكر ..
ليه إفتكرت ؟! ..
كان باقى لسه فـ علبتى فيه سيجاره فرط ..
ولعتها .. وسرحت فـ الماضى القديم ..
كالعاده حاول تفتكرنى بصوت حليم ..
كالعاده وفـ آخر السناريو .. السيجاره بتتطفى .. الضلمه تدخل جوا منى لحد صورتى ما تختفى !

(40)
الصبح بدرى المُرتبط ..
بأغانى فيروز أو نجاة ..
ضيقتك وتوهتك فـ اللى فات ..
الفيس وناس معمولها مـ الضخك _ بان _ ..
عمرو سليمان .. قلبت مين فـ الشاى شربت ؟! ..
ومنين وفين وإزاى هربت ..
انا كنت فاكر نفسى سبت ..
وطلعت متساب من زمان !

(41)
حبسة عنيك الصُبح فـ الطله مـ الشباك ..
ساعتك وولاعتك ..
همُا اللى فضلو معاك ..
وعنيك فـ عين دخان بيبصلك دايما ..
الـ LM أتقل .. بكتير من الـ Rosmans وعشان جدا غيّرت ..
والحاله لما تضيق يا بميل عليك يا صديق ..
يا بجيب سجاير فرط ..
ولعت كام مره وإنت بتشرب شاى ..
القهوه برده ساعات ..
تخلص فـ نص كلام قولته مع سيجاره ..
كل اللى بينّا إنتهى مفضلش غير إسمها ..
مفضلش غير ساره ..

(42)
من سنه واتنين وتلاته ..
كان نفسى أطلع وطلعت ..
كان نفسى أكون وأهو كنت ..
وكسبت الزمن الفايت والفرق أكتر من بونت ..
سلمت سلاحى لنفسى .. وغلبتنى مليون مره ..
الدنيا دى سلم لافف على وسط الكون من بره ..
والكوكب شايل ياما .. وأهو داير بينا يلف ..
والقلب قماش متقطع ..
ودماغى شريط بيسف ..
والنجمه تزق النجمه ..
والسما مش واسعه كفايه ! ..
والليل أوقات بيرخم .. فبقوله ياعم كفايه ..
وعيونى ان سكتت مره .. فده معناه انى معدتش ..
بعشق وبحب وأعوز ..
وملخص كل حياتى غنوة _ سيرة الأراجوز _ ..
المالح طلّع مالح ..
والجرح أهو جاب مجروح ..
وبرغم الجرح أنا ناشف صبار عمرى مادمعت ..
بتسند تانى وبطلع .. وبعافر مهما وقعت ..
إكتبوا على قبرى وصيه .. ان انا إنسان مش ليا ..
بعتنى للناس بقصيده ! .. وبأرخص تمن إتباعت ! ..
وياريتنى ما عوزت انى أطلع ..
وياريتنى فـ يوم ما طلعت

التعليقات

تعليق