قميص يوسف

قميص يوسف

تميل ما تملّ ..
تقول فـ تقلّ ..
وتفضل ضل عـ الحيطه ..
وصمت فـ منتهى الزيطه ..
وتفضل ضحكه مكتومه وتسمع فجأه ” مهزومه ” ..
فتسأل كل بُكره إتعاش حبيبتك فين ؟!..
حبيتك رايحه مش جايه ..
وبكره الجى ليل ساده ..
ونجمه بلمعه دبلانه ..
ودبله فـ درج متعانه ..
وكام ذكرى فـ بال مشغول ..
وصمت موبايلك المقفول ..
وتقليبك فـ دواليبك على هديه جابتهالك ..
ورد تملى يبقى مفيش ..
على مليون سؤال _ مالك _ ؟! ..
وخوف لا الخوف يزيد جواك ..
وقهوه وسنده عـ الشباك ..
وطعم الإنتظارعلقم ..
وطعم الدنيا من طعمه ..
ودرب الفُرقه كان سالك ودرب الحب مش سالك ..
بحبك دى هقولها لمين ..
وانا إتعودت أقولهاك
هجيب النجمه بكره لمين وانا على طول بجيبهالك ..
وليه أصبحت وقت البعد مش قادر ..
ووقت القرب مش قادر لقيتك سكه فـ مشيتك ..
ومطلبتش أشوف آخر ..
كفرت ساعتها بالنهايات ..
وقولت أسيبنى متغمى ..
وسبتك تسكنى دمى ..
ساعتها مكنش شيئ فارق لقيتك يومها باب مقفول ..
رجعت أبدأ من الأول ..
وكان ليه بس مـ الأول ..
أروح لما إحنا فـ الآخر ..
هنتفارق هنتفارق ..
بعيد مآساة قميص يوسف ..
وأجيب اللوم على الدنيا ..
وانا الغلطان ..
سواء قبلك سواء بعدك ..
بنام زعلان بنام زعلان ..
بطفى النور ..
وألف وأدور فـ دايره رسمها تفكيرى ..
وأخاف جدا فـ يوم عينى تشوفك ماشيه مع غيرى ! ..
لأغير على حاجه مش ليا
حبيبه رايحه مش جايه

التعليقات

تعليق