مقدمة ديوان فلوماستر أبيض

مقدمة ديوان فلوماستر أبيض

انا سبتنى فـ وسط الطريق علشان جبان ..
ايدى اللى دابت دق على كل البيبان..
الرعشه فيها وخطها عـ السطر مال..
قاعد بضفّر شعر واحده..
مشوفتهاش وأبنى فـ آمال..
وأكتب قصايد من وجع..
وأرميها فى درج المُحال..
مانا أصلى عمرى ماكنت بحلم أبقى حاجه زى ما كانوا العيال..
انا حتى عمرى ما كنت بلعب كوره فـ الشارع معاهم..
ولا عمرى حتى لعبت بلي..
ولا كان لى جرأه أنط سور المدرسه وأجرى..
الاسم: أهو شوية حروف..
السن: مش فاكر أوي..
الحاله: راضى بحالى وبقدري..
طيّب ساعات ..لكن ساعات شرير أوى..
انا مش لاقيلي اي وصف..
ومش عارفلى أى حال..
حبيت كتير ..وعرفت بنت وغيرها..
وإتحبيت ساعات
..يمكن زمان انا كنت لخمه.. بس ناو.. مبقتش خيبه مع البنات..
الضلمه ليها جزء فيا.. وليا فيها كلام كتير..
وأعشق عتاب النفس فـ المرايات ..وأعشق كمان انغام أوى..
تقدر تقول الـMemory Card بتاعى صوتها بيجرى فيه..
والباقى عادى ” مش مهم” ..
وبحب فيروز من زمان.. صوتها أساسا فيه مسكن للألم..
امّا نزار ..فده قصه تانيه كبيره بعدين تتحكى..
كل حرف ما بين حروفى هتشوفوه..
وأحب أقول..
ضيعت وقت كتير اوى فـ مسلسلات كرتون زمان..
وأحب أشكر قدوتى) سنفور كسول)..
مانا اصلى أكسل حد ممكن تعرفوه
..وأخص بالذكر الصديق (مايكل) يعنى اللى اللى مستحلمنى مهما عملت فيه..
وشريط (تملي معاك) عشان أول شريط كنت أشتريه..
منساش كمان..
البيت بتاعنا فـ البلد وأيام زمان..
و الفيفا أول مأبتديت.. إنى أميّز ..شكل الزراير فـ الدراع..
وعمنا أحمد نجم وقصيدة البتاع.. فيه كلام كتير ..قصتنا لسه مكمله جوا الديوان ..
فإستنوا يمكن تعرفوا!

التعليقات

تعليق