من فوق لتحت

من فوق لتحت

وانت لما يجيبوا سيرتى بعدها ..
متقولش شيئ ..
إسكت كتير
.. وإن صمموا .. إبقى إفتكرنى بكل خير
.. قول كان جدع ..
وكلنا ياما عيش وملح وقسمنا حالنا حزن فرح وكان ما بينا ذكريات ..
قول كان يحب الشاى أوى ويحب أكل البقسماط ..
قول كل حاجه
بس إوعى يا صديقى تقول ده مات
جيب سيرة ماتش PlayStation قطعتك فيه
.. جيب سيرة آخر خمسه جنيه
.. انا وانت قسمناها فـ موقف ..
علشان أنا أرجع راكب تاكس
.. وإوعاك تزعل ..
بالعكس إفرح ..
إشمعنى فـ دى دماغك رفضت تمشيها العكس
.. متقولش ان انا كنت رفيع
.. ولا حتى تجيب سيرة صوتى اللى قرفتك بيه
.. إتكلم مثلا عن إنى كان نفسى الناس تعرف جدا شكل الإنسان الجوانى ..
مش شكلى فـ صورى اللى على الفيس
.. إحكى عن القاعده مع صحابنا واللمه فـ سهرة كل خميس ..
كلمهم عن حبى لـ أبويا ..
أصلنا ملحقتش أقولهاله
.. كلمهم عن عمر إبن إختى وخليه يقولك بعدى يا خالو
.. كلمهم عن حبى الزايد للقهوه البندق و البيبسى ..
كلمهم عن إيدك لما تشاركنى بطاطس كيس شيبسى ..
عن تعبى من المشى كتير
.. عن كرهى ان أطلع بيتك فوق ..
علشان ملقتش أسانسير ..
عن كلمة متسيبها على الله ..
وبكره هتحلى عن فرحة قلبى بجون ميسى ..
الأول يوم ماتش الميلان ..
عن قولة هيه لما بتعلى كان عندى كلام أكتر لكن ..
الفرقه بتطلب كده بـ سكوت ..
وخصوصا لو فُرقة موت !

التعليقات

تعليق