Mug Matix

Mug Matix

وقِع ..إنكسَر المجّ بتاعى..
إندلق الشاى..
قاعد أحل معادلة عمرى.. وأحل ازاي!
خدت الجَذر.. لأيام فرحى.. ساويتها بصِفر..
واهي مَجْموعة الحَل لـ عُمرى.. طلعت فاي..
بعمل مسقط رأسى..
وبرسم بَجمع بَطرح بَضرب بَقسم!
وأرجع أفُك الجذر وأربّع..
لمّا نتوه فـ دواير الدنيا.. واما الثانية تجرّ الثانيه..
وأما الكدبَه بتبدأ توسع.. لما اندلق الشاي على رجلي..
رجلي اتحرقت..
حتى سنين العُمر الجايه..
زى بقية عُمرى ..
اتسرقت..
حاجه وضاعت.. فرقت جدا..
حاجه إنكسرت.. بس ما فرقِت!
وبطرح العُمرين من بعض.. ينتج ..عُمر جديد ..بالسالب..
ويا بخت اللي يبات مغلوب.. وأنا عمرى ..ما ببيّت غالب..
ضاع العُمر فـ حسبه غريبه..
وهو المطلوب اثباته..
انك مهما تعيش فـ الدنيا..
عُمرك يوم ما تقشّ بشايب!

التعليقات

تعليق